Тарасов Савва Иванович-I 1917 сыллаахха төрөөбүтэ. Сэрии иннинэ Мытаах нэһилиэгэр «Эргис» холкуоска суоччутунан үлэлээбитэ.

Сэриигэ 1941 сыл атырдьах ыйыгар ыҥырыллыбыта. Волховскай фронт 40-с гвардейскай стрелковай дивизиятын 111-с гвардейскай стрелковай полкатыгар сулууспалаабыта. Ленинград куорат оборонатыгар сэриилэспитэ. 1942 сыл кулун тутар 18 күнүгэр хаҥас илиитигэр араанньы буолбута, Рыбинск куоракка госпиталга эмтэммитэ.

Үтүөрэн баран атырдьах ыйыгар иккиһин фроҥҥа барбыта. Савва 1942 сыл сэтинньи 11 күнүгэр Волгоград куорат анныгар буолбут кыргыһыыга геройдуу охтубута.

Кини ылбаҕай тыллаах – өстөөх хоһоонньут этэ. 1942 сыл от ыйын 18 күнүгэр, фроҥҥа иккистээн бараары туран, дьонугар хоһоон суруйан ыыппыта. «Дьонум эһиги саныаххыт миигин» диэн ааттаах хоһооно «Саллааттар суруктара» диэн хомуурунньукка бэчээттэммитэ.

Хоту сир омуга

Сахачаан ыччата -

Савелий мин кэлэн

Волгаҕа турабын.

Өҥөйөн көрдөххө

Харааран дириҥиэн!

Уҥуоргу эҥээрэ

Көҕөрөн кэрэтиэн!

Ийэ сир иннигэр

Сэриигэ кэлбитим.

Хотугу фроҥҥа

Сэриигэ киирбитим.

Сирилээн-ыйылаан

Буулдьалар ытыыллар.

Самолет эргийэр

Бомбалар эстэллэр.

Сөтөллө - сөтөллө

Таанкалар сырсаллар

Уотунан кытыастан

Уой! Сэрии да сэрии

Немецтэр суоластар

Ыталлар... сүрүккэй

Өстөөх биир буулдьата

Таппыта... абытай!

Хаҥастыыр илиибин

Өйдөнөн көрбүтүм:

Баастара сүрдээҕин,

Хааннара сүүрэриэн.

Уҥаахтаан хаалбытым,

Сүрэҕим тэбэриэн!

Түҥнэри кээһэллэр!

Март ыйын уон аҕыс

Күнүгэр бу буолтум.

Госпиталь иһигэр

Мин эмкэ киирбитим.

Үтүөрэн чөрөйөн

Бу кэлэн турабын.

Сарсын мин барабын

Иккиһин фроҥҥа.

Дьэ хайдах буоларын

Мин кыайан эппэппин:

Баҕар мин өлүөҕүм ?!

Баҕар мин эргиллиэм?!!

Оччоҕо Элиэнэ

Өрүһүм-эбэккэм

Үөрүүнэн көрсүһэн

Таҥнары уһаарыа.

Төрөөбүт куоратым

Якутскай иһигэр

Дьоллонон үөрүүнэн

Битийэ хаамыаҕым.

Тапталлаах ийэбэр,

Аҕабар киирэммин:

-«Дорообо, мин ийэм.

- «Мин аҕам» — диэн этиэм.

- Өлбөккө эргийэн

- Дьэ кэллим» - диэхтиэҕим.

Дьэ хайдах буолбутун

Сиһилии кэпсиэҕим.

Өллөхпүнэ арай:

Мин ийэм, мин аҕам

Сэрии бүттэҕинэ

Оччоҕо билиэххит.

Суох аата суоҕунан

Суох буола туруоҕа

Мин суохпун туоһулаан.

Ый тахсан кытарыа.

Оччоҕо аныаххыт

Бу ыытар ырыабын.

Нойосуус үөрэтэн

Ыллыаххыт куруутун.